Termiz davlat universitetiga Germaniyaning Myunster universiteti professori Silvia Reuvekamp hamda Bergishe Vuppertal universiteti professori Matthias Martinez tashrif buyurdilar.
Muloqot davomida mavjud akademik aloqalarni kengaytirish, xususan, Erasmus+ dasturi doirasida xalqaro yozgi maktab tashkil etish, nemis tili o‘qituvchilari uchun Myunster universitetida malaka oshirish va ilmiy stajirovkalarni yo‘lga qo‘yish, shuningdek, ta’lim jarayoniga germaniyalik mutaxassislarni jalb etish bo‘yicha tashabbuslar ilgari surildi.
Shuningdek, Nemis tili markazini tashkil etish, germanistika yo‘nalishida qo‘shma ilmiy loyihalar va xalqaro onlayn ilmiy jurnal yaratish, akademik almashinuv hamda qo‘shma ta’lim dasturlarini rivojlantirish istiqbollari yuzasidan fikr almashildi.
Uchrashuvda ilmiy hamkorlik ko‘lamini kengaytirishga alohida e’tibor qaratilib, Germaniya tomoni arxeologiya yo‘nalishida ham hamkorlikni yo‘lga qo‘yish, qo‘shma tadqiqotlar, arxeologik ekspeditsiyalar va ilmiy-amaliy loyihalarni amalga oshirishga qiziqish bildirdi.
Tashrif yakunida ilgari surilgan tashabbuslarni bosqichma-bosqich amalga oshirish hamda ta’lim va ilm-fan sohasidagi uzoq muddatli sheriklikni mustahkamlash bo‘yicha kelishib olindi.
