Termiz davlat universiteti jamoasi navbatdagi yirik ilmiy yutuqni faxr va iftixor bilan qarshi olmoqda. Universitetimizning yosh va iste’dodli olimi, biologiya fanlari bo‘yicha falsafa doktori (PhD) Jalilov Jamshed tomonidan olib borilgan ilmiy izlanishlar natijasida jahon fani uchun muhim yangilik taqdim etildi.
🟢Hisor tog‘ tizmasining Chosh darasida, dengiz sathidan 2000 metr balandlikdagi qoya-toshli hududlarda olib borilgan tadqiqotlar davomida quruqlik mollyuskalarining fan uchun mutlaqo yangi turi aniqlandi. Ushbu yangi tur xalqaro malakologiya ilmida Turanena gissarika sp. nov. nomi bilan qayd etildi.
🟢Yangi tur bo‘yicha olingan ilmiy natijalar xalqaro GenBank bazasiga joylashtirildi, tadqiqot esa Scopus bazasida indekslanuvchi nufuzli “Ruthenica” xalqaro jurnalida chop etildi. Shuningdek, yangi tur ZooBank — Xalqaro zoologik nomenklatura reyestrida ham rasman ro‘yxatdan o‘tkazildi.
🟢Bu yutuq nafaqat universitetimiz, balki O‘zbekiston ilm-fani uchun ham katta voqea hisoblanadi. Yosh olimimiz Jalilov Jamshed Jafar o‘g‘lini ushbu tarixiy muvaffaqiyat bilan samimiy tabriklaymiz va kelgusi ilmiy faoliyatida yanada ulkan zafarlar tilaymiz!
