Keksalarini qadrlash xalqimizga xos va mos fazilat bo‘lib, unga barchamiz amal qilsak, ularni qanchalik qadrlab, e’zozlasak hayotimiz shunchalik farovon va kelajagimiz porloq bo‘ladi.
Aytilganidek, “Har keksadan bir naql” eshitsak va buni hayotda qo‘llay olsak turmushimiz obod, hayotimiz osuda kechadi.
Bugun Termiz davlat universitetida bo‘lib o‘tgan "Uch avlod uchrashuvi" ham keksa avlod vakillarini qadrlashga, ulardan ko‘proq hayot saboqlarini o‘rganishga bag‘ishlangani bilan ahamiyatli bo‘ldi.
Mehmonlar Termiz davlat universitetida joylashgan "Qatag'on qurbonlari xotirasi" muzeyi faoliyati bilan tanishar ekan tarixiy davrlarni yodga olishdi. Axborot texnologiya fakultetida yosh avlod vakillari bilan uchrashishdi.
Turli sohada faoliyat yuritgan faxriy mehmonlar, fan arboblari, professor-o'qituvchilar bilan uchrashgan talabalar ularning hayot yo‘lini va aytgan pand-nasihatlarini jon quloqlari bilan tinglashdi.
Bunday hurmat-e’tibordan mamnun bo‘lgan keksa avlod vakillari yoshlarning kelajakdagi faoliyatiga zafarlar tilashdi, yurtimiz tinchligi va xalqimiz farovonligini tilab duoga qo‘l ochishdi.
