Bugun Termiz tumani Sabzipoya mahallasida joylashgan, Termiz davlat universitetiga qarashli “Paxtaoy” maskanida yirik bunyodkorlik va obodonlashtirish ishlariga start berildi
“Paxtaoy” hududida TerDU kasaba uyushmasi bog‘i va sanatoriy-oromgohi, shuningdek, oilaviy dam olish maskanlari, sport zonalari, bolalar uchun hordiq chiqarish hududlari hamda yordamchi xo‘jaliklarni tashkil etish ko‘zda tutilgan.
Bugungi jarayonlarda Surxondaryo viloyati hokimi Ulug‘bek Qosimov ishtirok etib, sanatoriy-oromgohi qurilishiga start berdi. Rektorimiz tomonidan hududda amalga oshiriladigan loyihalar, xususan, yordamchi xo‘jaliklarni yo‘lga qo‘yish, maskan hududini obodonlashtirish, ko‘kalamzorlashtirish va uning betakror tabiiy muhitini yanada boyitish borasidagi rejalar haqida ma’lumot berildi.
Taomilga ko‘ra ezgu ishlar oldidan duoga qo‘l ochilib, bunyodkorlik ishlarining xayrli va barakali bo‘lishi, maskanning el-yurt uchun manfaatli manzilga aylanishi haqida ezgu tilaklar bildirildi.
“Paxtaoy” — endilikda nafaqat dam olish maskani, balki tabiat, ta’lim, sog‘lomlashtirish va bunyodkorlik uyg‘unlashgan zamonaviy maskanga aylanmoqda!
