Surxondaryo viloyati mezbonligida o‘tkazilgan "Talabalar ligasi" sport musobaqalarining gandbol bo‘yicha Respublika final bosqichi yuqori saviya va murosasiz bahslarga boy tarzda yakunlandi.
Nufuzli musobaqada viloyatimiz sharafini munosib himoya qilib kelayotgan Termiz davlat universiteti gandbol jamoalari yana bir bor o‘zining mahorati, matonati va haqiqiy chempionlik ruhini namoyon etdi.
Musobaqa yakunlariga ko‘ra:
🥇 o‘g‘il bolalar jamoasi Respublika chempionligini qo‘lga kiritdi;
🥉 qizlar jamoasi esa faxrli uchinchi o‘ringa sazovor bo‘ldi.
"Talabalar ligasi"ning Respublika final bosqichida mamlakatimizning 14 hududidan 419 nafar sportchi-talaba hamda murabbiy ishtirok etdi.
Final uchrashuvlari va tantanali taqdirlash marosimida universitet rahbariyati, Oliy ta’lim, fan va innovatsiyalar vazirligi mas’ul xodimlari, viloyat mutasaddilari hamda keng jamoatchilik vakillari ishtirok etdi.
