Termiz davlat universitetida viloyatdagi umumta’lim maktablari hamda akademik litseylarning bitiruvchi sinf o‘quvchilari o‘rtasida nemis va fransuz tillari bo‘yicha “Rektor olimpiadasi” yuqori saviyada tashkil etildi.
Mazkur olimpiada O‘zbekiston Respublikasi Prezidentining xorijiy tillarni o‘rganishni yangi bosqichga olib chiqishga qaratilgan qarorlari ijrosini ta’minlash, iqtidorli yoshlarni aniqlash va qo‘llab-quvvatlash maqsadida o‘tkazildi. Olimpiadada viloyatimizning shahar va tumanlaridan tashrif buyurgan bilimdon o‘quvchilar o‘z bilim va salohiyatlarini sinovdan o‘tkazishdi. Tanlov jarayonlari nizom asosida shaffof va adolatli tarzda tashkil etilib, barcha bosqichlar videokuzatuv ostida olib borildi.
Tadbir viloyat Maktabgacha va maktab ta’limi boshqarmasi hamkorligida tashkil etildi. G‘oliblar universitet tomonidan diplom hamda esdalik sovg‘alari bilan taqdirlanadi. Shuningdek, universitet Talabalar oshxonasida o‘quvchi yoshlar hamda ularning ustozlari uchun dasturxon yozilib, mehmonlarga universitet kampusi bo‘ylab sayohat ham uyushtirildi.
