“Surxon Sanoat Qurilish” kompaniyasi boshqaruv raisi B. Qodirov hamda universitet rektori A. Toshqulov ishtirokida bitiruvchi talabalar bilan ochiq muloqot tashkil etildi.
Dastlab kompaniya vakillari ko‘p tarmoqli tuzilmaning faoliyat yo‘nalishlari, amalga oshirilayotgan loyihalar hamda mavjud vakant ish o‘rinlari haqida batafsil ma’lumot berishdi.
Ma’lumot o‘rnida, “Surxon Sanoat Qurilish” kompaniyasi tarkibida 50 ga yaqin qurilish, ishlab chiqarish va xizmat ko‘rsatish yo‘nalishidagi subyektlar faoliyat yuritadi.
Korxonalarda xorijiy mutaxassislar bilan bir qatorda 5000 nafarga yaqin fuqaroning bandligi ta’minlangan. Shuningdek, kompaniya Yevropa davlatlari uchun malakali kadrlarni tayyorlash va ularni ishga yo‘naltirish borasida ham amaliy ishlarni olib bormoqda.
Samimiy ruhda kechgan tadbir davomida talaba-yoshlar o‘zlarini qiziqtirgan savollarga batafsil javob olishdi. Universitet rektori A. Toshqulov ta’kidlaganidek, mazkur uchrashuv har ikki tomon uchun manfaatli bo‘ldi.
Bildirilgan taklif va tashabbuslar TerDU hamda “Surxon Sanoat Qurilish” kompaniyasi o‘rtasidagi hamkorlikni yanada kengaytirishga xizmat qiladi.
