Termiz davlat universitetida rektor A.Toshqulov rahbarligida navbatdagi apparat yig‘ilishi bo‘lib o‘tdi. Unda soha prorektorlari, fakultet dekanlari, mas’ul bo‘lim boshliqlari hamda Tabiiy fanlar fakulteti professor-o‘qituvchilari ishtirok etdi.
Tahliliy va tanqidiy ruhda o‘tgan yig‘ilishda dastlab Tabiiy fanlar fakultetining faoliyati, KPI ko‘rsatkichlari hamda o‘tkazilgan so‘rovnoma natijalari muhokama qilindi. So‘rovnoma ishtirokchilari tomonidan faoliyati yuqori baholangan ustozlarga minnatdorchilik bildirildi. Shu bilan birga, mavjud kamchiliklar yuzasidan tegishli xulosalar chiqarish va ish samaradorligini oshirish bo‘yicha vazifalar belgilandi.
Yig‘ilishda “Kelajakka qadam” dasturi doirasida talabalarni tadbirkorlikka keng jalb qilish, bitiruvchilar bandligini ta’minlash hamda xorijiy investitsiyalarni jalb etish borasida fakultetlar kesimida amalga oshirilayotgan ishlar tahlil qilindi. Shuningdek, universitetga biriktirilgan hududlarida “Yashil makon” umummilliy loyihasi doirasida ekilgan mevali va manzarali daraxt ko‘chatlarini parvarish qilish ishlarini tizimli tashkil etish bo‘yicha mas’ullar biriktirildi.
Yig‘ilish yakunida A.Toshqulov tomonidan talabalarning bo‘sh vaqtini mazmunli tashkil etish, shuningdek yakuniy davlat attestatsiya sinovlarini yuqori saviyada o‘tkazish yuzasidan mas’ul prorektor va mutasaddilarga tegishli topshiriqlar berildi.
