Termiz davlat universiteti fakultetlarida atoqli shoira, O‘zbekiston xalq shoiri Zulfiya Isroilova tavalludining 111 yilligiga bag‘ishlangan ma’naviy-ma’rifiy va adabiy-badiiy tadbirlar yuqori saviyada tashkil etildi.
O‘zbek filologiyasi, Tabiiy fanlar, Ijtimoiy fanlar hamda Axborot texnologiyalari fakultetlarida o‘tkazilgan tadbirlarda Zulfiyaxonimning ibratli hayoti, boy ijodiy merosi, ayol qalbi, vafo va sadoqatni kuylagan betakror she’riyati haqida atroflicha so‘z yuritildi.
Tadbirlar davomida shoira hayoti va ijodiga bag‘ishlangan sahna ko‘rinishlari namoyish etildi, uning she’rlari asosida kuy-qo‘shiqlar talaba-yoshlar tomonidan mahorat bilan ijro etildi. Bu esa barchaga ko‘tarinki kayfiyat va ilhom ulashdi.
E’tiborlisi, O‘zbek filologiyasi fakulteti professor-o‘qituvchilari xizmat safari bilan Malayziyada bo‘lib, ushbu qutlug‘ sana munosabati bilan she’riyat kechasini tashkil etdilar. Unda shoira ijodining o‘zbek adabiyotidagi beqiyos o‘rni keng targ‘ib qilindi.
