Buxoro davlat universiteti mezbonligida bo‘lib o‘tgan nufuzli xalqaro kimyo va matematika fan olimpiadalarida (BIMO–2026 va BICHO–2026)Termiz davlat universiteti talabalari ham faol ishtirok etib, yuksak natijalarga erishdilar.
Xususan, kimyo yo‘nalishidagi iqtidorli talabalarimiz 1 ta kumush va 3 ta bronza medalini qo‘lga kiritgan bo‘lsa, matematika yo‘nalishi talabalari ham aynan shunday natijani qayd etib, TerDU sharafini munosib himoya qildilar.
Ma’lumot o‘rnida ta’kidlash joizki, ushbu xalqaro olimpiadalarda 10 dan ortiq davlatdan 500 nafardan ziyod talabalar ishtirok etdi. Bu esa erishilgan natijalarning naqadar yuqori va e’tiborga molik ekanidan dalolat beradi.
Olimpiadaning tantanali taqdirlash marosimida talabalar bilan bir qatorda, ularni ushbu yutuqlarga yetaklagan professor-o‘qituvchilarimizga ham alohida ehtirom va hurmat ko‘rsatildi. Termiz davlat universiteti jamoasi o‘z iqtidorli talabalari va fidoyi ustozlari bilan haqli ravishda faxrlanadi!
