“YOSH CHEGARACHILAR” BILAN UCHRASHUV: VATANGA SODIQLIK, INTIZOM VA MARDLIK SABOQLARI
Xabaringiz bor, O‘zbekiston Respublikasi Qurolli Kuchlari tashkil etilganligining 34 yilligi hamda Vatan himoyachilari kuni munosabati bilan mamlakatimiz bo‘ylab 15-dekabrdan 15-yanvargacha vatanparvarlik oyligi o'tkazilmoqda, ushbu oylik doirasida Davlat xavfsizlik xizmati Chegara qo‘shinlari tasarrufidagi Surxondaryo viloyati Termiz shahrida joylashgan “Yosh chegarachilar” harbiy-akademik litseyida TerDU rektori A.Toshqulov ishtirokida yoshlar uchrashuvi tashkil etildi.
Uchrashuv samimiy, chuqur ma’naviy va hayotiy mazmunda o‘tdi. Rektor o‘z chiqishida yoshlarga rasmiy nutq emas, balki yurakdan chiqqan fikrlar bilan murojaat qilib, ularni Vatan ishonchini oqlashi lozim bo‘lgan avlod sifatida baholadi.
📑 “Sizlar oddiy o‘quvchi emassizlar. Sizlar — ertangi qaror qabul qiluvchilar, ertangi chegara qalqoni, ertangi ota va rahbarlarsiz”, — deya ta’kidladi rektor.
Muloqotda buyuk ajdodlarimiz merosiga tayanib, Amir Temur, Jaloliddin Manguberdi, Najmiddin Kubro kabi tarixiy shaxslar misolida haqiqiy erkaklik, mardlik va intizom mohiyatini yoshlarga tushuntirdi.
➡️Uchrashuv yakunida yoshlarga quyidagi murojaat yangradi:
📑“O‘zingizga xiyonat qilmang. Oriyatingizni asrang, intizomni hayot qoidasiga aylantiring, ota-ona duosini oling va Vatan ishonchiga munosib bo‘ling. Men sizlarga ishonaman. Eng muhimi — Vatan sizlarga ishonadi.”
