Termiz davlat universiteti professor-o‘qituvchilari Turkiya Respublikasida o‘tkazilgan xalqaro tadbirlarda ishtirok etishdi

Yaqinda Turkiya Respublikasida bo‘lib o‘tgan qator nufuzli xalqaro tadbirlarda Termiz davlat universitetining professor-o‘qituvchilari faol ishtirok etdilar.

"Turk dunyosidagi ayollar: muvaffaqiyat tarixi" mavzusidagi xalqaro seminar davomida turk ayollarining ijtimoiy, siyosiy va ilmiy sohalardagi yutuqlari, jamiyat taraqqiyotidagi o‘rni va to‘plagan tajribalari yuzasidan fikr almashildi. Seminar doirasida universitetimiz vakillari ma’ruza bilan qatnashib, turk dunyosida ayollarning ta’lim va ilm-fandagi rolini yanada mustahkamlashga oid taklif va tavsiyalarini bildirdilar.

Shuningdek, Al Farobiy nomidagi 14-Xalqaro ilmiy tadqiqot va innovatsiya kongressida dunyoning turli davlatlaridan tashrif buyurgan olimlar, tadqiqotchilar va mutaxassislar ishtirok etib, zamonaviy ilmiy yo‘nalishlardagi izlanishlar, innovatsion loyihalar va yangiliklar bilan o‘rtoqlashdilar.

Mazkur xalqaro tadbirlardagi ishtirok universitetimiz xalqaro hamkorlik doirasini kengaytirish, ilmiy aloqalarni mustahkamlash va professor-o‘qituvchilarning malakasini oshirishda muhim ahamiyat kasb etadi.