TerDU va Sankt-Peterburg davlat universiteti oʻrtasida hamkorlik shartnomasi imzolandi
Rossiya-Oʻzbekiston toʻrtinchi taʻlim forumi doirasida navbatdagi uchrashuv Yevropa va dunyodagi eng yirik ilmiy-taʼlim markazlaridan biri hisoblangan Sankt-Peterburg davlat universiteti bilan boʻlib oʻtdi.
Uchrashuvda ushbu universitet bilan oʻzaro tajriba almashish, fan va texnologiya, ilmiy tadqiqot yoʻnalishlarida oʻzaro hamkorlik qilish, magistrant va tayanch doktorantlarning ilmiy ishlariga taʼlim muassasasidagi yetakchi olim va professorlarni jalb etish, talabalar va oʻqituvchilar almashinuvini yoʻlga qoʻyishga kelishib olindi.
Maʼlumot uchun: 1724-yilda tashkil topgan Sankt-Peterburg davlat universitetida hozirda 20 mingdan ortiq talaba tahsil olmoqda. U 15 dan ortiq yirik laboratoriya va 23 ta resurs markazlariga ega. Xalqaro QS reytingida 365-o'rinni egallaydi. Universitet bitiruvchilari bir necha bor Nobel va Filds mukofotlari laureatlariga aylanishgan. Sankt-Peterburg universiteti Rossiyada birinchi boʻlib ilmiy tadqiqotlar uchun kadrlarni qoʻllab-quvvatlash maqsadida grant dasturini ochgan.
Ayni paytda oliygohda 300 nafardan ortiq xorijlik oʻqituvchilar faoliyat yuritib kelmoqda.