Yigʻilish avvalida Oliy attestatsiya komissiyasining tegishli qarori bilan ilmiy unvon va darajalar berilgan o'qituvchilarga professor, dotsent hamda falsafa doktori (PhD) attestat hamda diplomlari topshirildi.
Kun tartibidagi muhim masalalardan biri — ilmiy sohadagi ishlarni samarali tashkil etish chora-tadbirlari toʻgʻrisidagi fikr-mulohazalar tinglanib, bu boradagi vazifalar belgilab olindi.
Termiz davlat universiteti professor-oʻqituvchilarining “Scopus” bazasidagi jurnallarda 2024-yilning bugungi kuniga qadar 40 ta maqolasi indekslandi. Bu oʻtgan yilning shu davriga nisbatan 50% ga koʻp. 2024-yilning oxiriga qadar har bir fakultetning professor-oʻqituvchilari soniga nisbatan kamida 60% “Scopus” bazasidagi jurnallarda maqola nashr etish topshirigʻi yuklatildi.
Yigʻilishda “Ustoz-shogird” tizimining mazmun-mohiyati, uni anʼana sifatida shakllantirish - uzluksiz taʼlim tizimini rivojlantirishning muhim omili ekanligi taʼkidlanib, talabalarni ustoz-shogird tizimi boʻyicha professor-oʻqituvchilarga biriktirish toʻgʻrisida qaror qabul qilindi.
Rektor: oʻqituvchining oʻz ustida ishlashi, pedagogik mahoratini oshirib borishida “Ustoz-shogird” usuli kutilgan natijani berishini bugungi davrning oʻzi koʻrsatib turibdi. Ajdodlarimizdan bizga meros boʻlib oʻtib kelayotgan ustoz-shogirdlikni tizimga aylantirish taʼlim samaradorligini oshirishda yaxshigina natija beradi.
Yigʻilishda masʼullarga yakuniy davlat attestatsiyasiga puxta tayyorgarlik koʻrish, shaffof va adolat prinsiplariga qatʼiy rioya qilgan holda oʻtkazish, yangi 2024-2025-oʻquv yili uchun kafedra yuklamalari va taqsimotlarini oʻz vaqtida shakllantirish boʻyicha vazifalar berildi.
Yigʻilish yakunida barcha masalalar yuzasidan tegishli qarorlar qabul qilinib, masʻullarga zaruriy topshiriqlar yuklatildi.
