Ostona shahrida Termiz davlat universiteti rektori Abduqodir Toshqulov hamda Qozog‘istondagi Yevroosiyo milliy universiteti rektori Yerlan Sidikov o‘rtasida hamkorlik uchrashuvi bo‘lib o‘tdi.
Unda yangi xalqaro loyihalar, professor-o‘qituvchilar va talabalarning akademik mobilligi bo‘yicha hamkorlik ishlarini yo‘lga qo‘yish masalalari muhokama qilindi.
Uchrashuvdan so'ng A.Toshqulov Yevroosiyo milliy universitetidagi taʼlim jarayoni bilan yaqindan tanishib hamkor universitet professor-o‘qituvchilarini Termiz davlat universitetining 70 yillik yubileyi munosabati bilan o‘tkaziladigan tadbirga taklif etdi.
Maʼlumot o‘rnida: QS reytingida 335-o‘rinni egallagan Yevroosiyo milliy universiteti bilan Termiz davlat universiteti o‘rtasida 2021 yilda shartnoma imzolangan bo‘lib, bir guruh professor-o‘qituvchilarimiz ushbu universitet talabalariga maʼruzalar o‘qishgan.