Tarix fakultetida tarix fanlari doktori, professor, Abu Rayhon Beruniy nomidagi davlat mukofotining sovrindori, Oʻzbekiston Respublikasi Fanlar Akademiyasi akademigi, Oʻzbekistonda xizmat koʻrsatgan fan arbobi Ahmadali Asqarov bilan talabalar uchrashuvi tashkil etildi.
Ahmadali Asqarov 450 dan ortiq ilmiy va ilmiy-ommabop maqolalar, shu jumladan 16 ta monografiya, darslik va oʻquv qoʻllanmalar muallifi. Oʻzbekiston hududidagi ilk shahar va ilk ibodatxona qoldiqlari aniqlangan Jarqoʻton yodgorligining kashfiyotchisi. Dunyo tamaddunida beshinchi sivilizatsiya – Oks sivilizatsiyasini ilmiy isbotlagan olim.
Uchrashuvda zahmatkash olim oʻz faoliyatiga toʻxtalib oʻtar ekan, oʻtgan asrning ikkinchi yarmidan boshlab, bugungi Yangi Oʻzbekistonning tarixini yozish davomida paydo boʻlgan gʻoyalari va qarashlari bilan oʻrtoqlashdi. Samimiy va savol-javoblarga boy tarzda oʻtgan uchrashuvda talabalar akademikdan arxeologik ekspeditsiyalarda kechgan yillari, ilmiy izlanishlari, tarixiy voqealar haqida soʻzlab berishlarini soʻrashdi.
