Ushbu ilmiy markaz taʼlimdan boshlab, ilmiy ishlarni tijoratlashtiradigan yirik laboratoriyaga aylanadi — A.Toshqulov
Termiz davlat universiteti rektori zamonaviy tipda bunyod etilgan “Ilgʻor texnologiyalar ilmiy-tadqiqot markazi”ni foydalanishga topshirish boʻyicha amalga oshirilayotgan ishlar bilan tanishdi.
Mazkur markazni tashkil etish topshirigʻi 2021-yil 8-oktyabr kuni Oʻzbekiston Respublikasi Prezidentligiga nomzod Shavkat Mirziyoyevning Surxondaryo viloyati saylovchilari bilan oʻtkazilgan uchrashuv chogʻida berilgan boʻlib, ayni paytda binoda qurilish ishlari yakunlangan.
Rektor jahon standartlari asosida 26,7 mlrd soʻm evaziga bunyod etilgan bino imkoniyatlarini koʻzdan kechirar ekan, laboratoriya 210 nomdagi zamonaviy asbob uskunalar va jihozlar bilan taʼminlanishini taʼkidladi. Shuningdek, kimyo fakulteti professor-oʻqituvchilari bilan suhbat davomida ularning ilmiy tadqiqot ishlari, rejalari xususidagi fikr-mulohazalari, takliflari tinglandi.
Jahonning nufuzli universitetlarining ilmiy yutuqlarini o'zlashtirib, sohaga tezroq tatbiq etish orqali universitetning respublika va xalqaro maydondagi reytingini yanada oshirish hamda tez kunlarda 12 milliard soʻmga qoʻshimcha laboratoriya jihozlarini olib keltirish bo'yicha ko'rsatmalar berildi.
