Surxondaryo viloyatining ijtimoiy-iqtisodiy rivojlanishi bilan yaqindan tanishish hamda oʻzaro hamkorlik masalalarini muhokama etish uchun viloyatimizga tashrif buyurgan Amerika Qoʻshma Shtatlarining favqulodda va muxtor elchisi Daniyel Rozenblyum boshchiligidagi delegatsiya Termiz davlat universitetiga tashrif buyurdi.
Uchrashuvdan maqsad, mamlakatimizda taʼlim sohasida amalga oshirilayotgan ishlar, bu borada elchixonalarning hamkorligini oshirish, kadrlar salohiyatini yanada yuksaltirish uchun joylarda, xususan, Surxondaryoda ijtimoiy himoyaga muhtoj oilalarning farzandlari uchun liderlik va ingliz tili oʻquv kurslarini tashkil etishdir. Delegatsiya aʼzolarini Termiz davlat universiteti rektori Avazjon Marahimov boshchiligidagi universitet rasmiylari kutib olishdi.
Samimiy ruxda boshlangan uchrashuv avvalida elchi janoblari qabul uchun minnatdorchilik bildirib, Amerika Qoʻshma Shtatlari tomonidan Oʻzbekistonga kiritilayotgan investitsiyalar, AQSHning Oʻzbekistondagi elchixonasi bilan Termiz davlat universiteti oʻrtasidagi hamkorlik aloqalari haqida toʻxtalib oʻtdi.
Maʼlumot oʻrnida aytish kerakki, universitetning Amerika Qoʻshma Shtatlaridagi oliy taʼlim muassasalari bilan hamkorlik aloqalari 2020-yildan boshlab yoʻlga qoʻyilgan. Bu davrda ikki tomonlama koʻplab loyihalar amalga oshirildi. Jumladan, ayni vaqtda bevosita elchixonaning saʼyi harakatlari bilan Fulbrayt ingliz tili oʻqituvchi-assistenti dasturi doirasida Kristofer Kouen Termiz davlat universitetining Xorijiy filologiya fakultetida talabalar uchun amaliy oʻquv-mashgʻulotlari hamda darsdan tashqari Speaking Club faoliyatini olib bormoqda.
Shuningdek, universitetning ingliz tili va adabiyoti kafedrasi professor-oʻqituvchilari AQSHning Union Institute and University oliygoxi bilan hamkorlikda American Studies (Amerikashunoslik) nomli oʻquv-qoʻllanma yaratish borasidagi loyiha ustida ishlashayapti. Xorijiy filologiya fakultetining 9 nafar professor-oʻqituvchilari ushbu universitet tomonidan tashkil etilgan onlayn kurslarda ham faol ishtirok etib kelishmoqda.
Uchrashuvda ayni loyihalar eʼtirof etib oʻtildi. Elchi janoblari uchrashuv davomida universitet rektoriga ijtimoiy himoyaga muhtoj oilalarning farzandlari va yoshlar uchun The English Access Scholarship loyihasi doirasida ingliz tilini oʻqitish kurslarini tashkil qilish taklifini berdi.
Rektor mazkur taklifni qoʻllab quvvatlagan holda, Amerikaning yetakchi universitetlari bilan hamkorlikda ingliz tilini chet tili sifatida oʻqitishga moʻljallangan virtual platforma tashkil etish taklifini bildirdi. Tashrif davomida elchi janoblari Termiz davlat universitetning iqtidorli talabalari bilan uchrashdi. Uchrashuv davomida ikki tomon oʻzaro esdalik sovgʻalarini ulashdi.
Doʻstona muloqot tarzida kechgan uchrashuvda talabalar elchi janoblariga Amerikadagi oliy taʼlim tizimi, davlatlarimiz oʻrtasidagi hamkorlik aloqalari borasida oʻzlarini qiziqtirgan savollar bilan murojaat qilishdi. Tashrif davomida Daniyel Rozenblyum elchixona nomidan universitet kutubxonasiga ingliz tilini oʻqitish metodikasi va ingliz tilida chop etilgan badiiy kitoblar jamlanmasini sovgʻa qildi.
Yakunda Amerika Qoʻshma Shtatlari oliy taʼlim muassasalari va Termiz davlat universiteti oʻrtasidagi kelgusidagi hamkorlik aloqalariga kelishib olindi.
