Giyohvandlikka qarshi kurashish, uning zararli oqibatlaridan kishilarni, ayniqsa, yoshlarni xabardor qilish, targʻibot-tashviqot ishlarini olib borish doimiy va muhim faoliyat turlaridan biridir. Chunki asr vabosi – giyohvandlikka chalingan kimsalar oilasining tinchi buzilayotgani, farzandlarining qarovsiz qolayotgani, oʻzlari esa salomatligini yoʻqotib, bevaqt oʻlim topayotgani hech kimga sir emas.
Termiz davlat universitetida “O’quvchi-talabalar orasida giyohvandlik vositalarini tarqalishiga qarshi kurashish” mavzusida oʻtkazilgan davra suhbatida ham ana shu haqda soʻz yuritildi.
Tadbirda O‘zbekiston Respublikasi Vazirlar Mahkamasi huzuridagi Narkotik moddalarni nazorat qilish milliy markazi vakili, O‘zbekiston Respublikasi Ichki ishlar vazirligi Surxondaryo viloyati Ichki ishlar boshqarmasi, O‘zbekiston Musulmonlari idorasi Surxondaryo viloyat vakilligi, Surxondaryo viloyati Narkologiya dispanseri mas’ul xodimlari ishtirok etishdi. Davra suhbatida mas’ullar giyohvandlik, uning salbiy oqibatlari, jamiyat taraqqiyotiga salbiy ta’sirlari haqida ma’lumot berdilar.
Yakunda giyohvandlikning millionlab kishilarning naslini mayib-majruh etayotgani, umriga zomin boʻlayotgani haqida hikoya qiluvchi videofilm namoyish etildi.
Tadbirda talabalar va professor-o‘qituvchilar faol ishtirok etishdi.
