Maʼlumki, 2021-yilda xalqimiz necha yuz yillik tarixi davomida orzu qilib, intilib yashagan va XX asr soʻnggida erishgan, mamlakatimiz hayoti va taqdirida tub burilish yasagan, tom maʼnodagi buyuk, olamshumul voqea – Oʻzbekiston Respublikasi davlat mustaqilligi eʼlon qilinganiga oʻttiz yil toʻladi.
Shu munosabat bilan butun respublikamiz bo’ylab “Yangi Oʻzbekistonda erkin va farovon yashaylik!” shiori ostida bayram tantanalari davom etmoqda. Shak-shubhasiz, ushbu shior har bir vatandoshimizning qalbini mehr va iftixorga toʻldirib, Vatanga sadoqat bilan xizmat qilishga, yurtimizni bundanda qudratli boʻlishi uchun hissa qoʻshishga undaydi.
Prezidentimiz Shavkat Mirziyoyev rahbarligida 28-iyul kuni mehribonlik uylari tarbiyalanuvchilarini qoʻllab-quvvatlashga qaratilgan vazifalar boʻyicha oʻtkazilgan videoselektor yigʻilishida sohada mutlaqo yangi tizim joriy etilishi maʼlum qilindi.
Unda oliygohlar zimmasiga ham qator vazifalar yuklatilgan edi. Xususan, OTM rektorlari kutubxona fondini boyitish, bolalarni axborot texnologiyalari, xorijiy tillar, aniq va tabiiy fanlarga oʻrgatish va ularning kelgusida oliygohlarga kirishiga koʻmaklashish muhitini shakllantirishga, teatr va konsertlar tashkil etishga masʼul va javobgar etib belgilandi. “Bu muassasalarning moddiy homiysi bor, maʼnaviy homiy kerak. Bu ham savob, ham kerakli ish” deb aytib oʻtgan edi Prezidentimiz videselektor yigʻilishida.
Ushbu vazifalar ijrosini taʼminlash maqsadida joriy yilning 24 avgust sanasida eng ulugʻ va eng aziz bayram munosabati bilan Termiz davlat universiteti Musiqa ta’limi yo’nalishi professor-o’qituvchilari va talabalari Termiz shahridagi 12-mehribonlik uyiga tashrif buyurishda hamda ulugʻ ayyom bilan tabriklab, vatanni madh etuvchi musiqiy dasturlar namoyish etishdi.
Mustaqillik shukuhi kezib yurgan ayni kunlarda oʻtkazilgan ushbu tadbir bolajonlarga manzur bo’ldi.
Eng muhimi, bolajonlar koʻzidagi quvonch mamnunlik va minnatdorlik tuygʻularining ifodasi boʻldi.
